दिनभरै खास खबर, एक नजर मा

उत्तराखंड मा थमी कोरोना की रफ्तार

उत्तराखंड मां धीरे-धीरे कोरोना का मामला कम होंणा छन. जनवरी का पैला हप्ता बटी ही कोरोना संक्रमित मरीजुं की संख्या लगातार कम होंणी च. प्रदेश मां अब कोरोना संक्रमितुं की संख्यां 96657 रै गी. जबकि यां से मन्न वालौ की संख्या 1686 ह्वे गी. प्रदेश मा कोरोना संक्रमित मरीजुं की रिकवरी रेट 95.80% च.

अपणुं उत्तराखंड

चमोली आपदा कु आज 15वूं दिन

चमोली आपदा कु आज 15वूं दिन च, आपदा का पैला दिन से अब तक यख लगतार राहत और रेस्क्यू आॉपरेशन जारी च. ई आपदा मा मन्न वालौ की संख्या 67 ह्वे गी. वखी, ज्या मां से कई शवूं की पछ्यांण भी ह्वे गी. ई आपदा मा अबी 137 से ज्यादा लोग अभी भी लापता छन, जौ थै ढ़ूढणौं रेस्क्यू ऑपरेशन जारी च.

देहरादून थै इलेक्ट्रिक बसूं की सौगात

राजधानी देहरादून मा लोखुं की यात्रा थै सुगम बणौणौ राज्य सरकारै तरफा बटी आज से इलेक्ट्रिक बसूं की शुरुआत करे गी. फिलहाल पांच बसूं थै आज मुख्यमंत्री त्रिवेंद्र सिंह रावत न हरी झंडी दिखै की रवाना करी. भविष्य मा दूसरी कई बसूं थै राजधानी मा चलौणे योजना भी सरकारै च.

सीएम ने करी क्षत्रिय जागरण स्मारिका 2020-21 कु विमोचन

मुख्यमंत्री त्रिवेन्द्र सिंह रावत न आज क्षत्रिय जागरण स्मारिका 2020-21 कु विमोचन करी. ये दौरान मुख्यमंत्री न बोली कि ईं स्मारिका मा पौराणिक एवं समसामयिक घटनाऊं कू सही समावेश करे गी. दगड़ा मां ही ई पुस्तिका मा देश की रक्षा थै लिए अपणु सर्वोच्च बलिदान देंण वाला पराक्रम्यूं थै भी याद करे गी.

उत्तराखंड सचिवालय का गृह अनुभाग बटी फाइल चोरी

उत्तराखंड सचिवालय का गृह अनुभाग बटी आरटीआई की तीन फाइलें चोरी ह्वे गिन. ई घटना का बाद से ही विभाग मा हड़कंप मच्यूं च. अनुभाग अधिकारी पंकज जोशी की तहरीर पर देहरादून शहर कोतवाली मा अज्ञात का खिलाफ मुकदमा दर्ज करे गी. उत्तराखंड सचिवालय बटी फाइल गायब होणौ यू दूसरू मामला च.

आज लक्सर मा महापंचायत

कृषि बिलू का विरोध मा आज लक्सर मा महापंचायत ह्वे, सुबेर बटी ही किसान महापंचायत मा शामिल होणौ ट्रैक्टरों और गाड़ि्यू से यख पौंछिन. आज की महापंचायत मा बड़ी संख्या मा किसान नी पौंछिन. वखी, दूसरी ओर आज कांग्रेस न भारतीय किसान यूनियन थै अपणु समर्थन दिनी.

51 किलो गांजा दगड़ि तीन तस्कर गिरफ्तार

देहरादून का थाना सहसपुर पुलिस न एक सक्रिय गांजा गिरोह कु पर्दाफाश करी. ज्या मां तीन शातिर नशा तस्करूं थै गिरफ्तार करे गी. यू नशा तस्करूं से 51 किलो गांजा बरामद करे गी, जैकी कीमत 20 लाख रुप्या से अधिक च, पुलिस न यू का खिलाफ मुकदमा दर्ज करेली

शातिर लखनऊ बटी गिरफ्तार

उत्तराखंड STF थै एक बार फिर बड़ी सफलता मिली. एसटीएफ न सरकारी नौकरी दिलौणा नौ पर ठगी कन्न वाला गिरोह का शातिर सदस्य थै लखनऊ बटी गिरफ्तार करी. यू गिरोह देश का कई राज्यूं मेा बेरोजगार लोखूं से ठगी करदू छौ. जानाकारी का मुताबिक ये गिरोह FCI मा नौकरी दिलौणा नौ पर धोखाधड़ी करदू छौ.

एक्शन मां एसएसपी

एसएसपी दलीप सिंह कुंवर न एक बार फिर से जनपद का निरीक्षक और उप निरीक्षकूं का तबादले करीन. ज्या मा एक निरीक्षक थै एसओजी और एक उप निरीक्षक थै चौकी प्रभारी बणये गी. जबकि 6 उपनिरीक्षकूं थै पुलिस लाइन बटी थानों में तैनात किये गी.

काशीपुर मा द्वी बाइकूं की टक्कर

काशीपुरै मानपुर रोड पर आज द्वी बाइकूं की अमणा-समणा भिड़त ह्वे गी. ये हादसा मां द्ववी लोखूं की मौका पर ही मौत ह्वे गी. जबकि एक युवक गंभीर रूप से घायल ह्वे गी, जै थै इलाजौ एक निजी अस्पताल मा भर्ती करये गी, जख वेकी स्थिति गंभीर बंणी च.