मुंबई - प्रधानमंत्री किसान सन्मान निधी योजनेंतर्गत उल्लेखनीय कार्यासाठी महाराष्ट्र शासनाला देशात प्रथम क्रमांकाचा पुरस्कार जाहीर झाला आहे. पुणे आणि अहमदनगर जिल्हयांना वेगवेगळया श्रेणींमध्ये प्रथम क्रमांकाचा पुरस्कार जाहीर झाला आहे. केंद्रीय कृषी मंत्री नरेंद्र सिंह तोमर यांच्या हस्ते या पुरस्काराचे वितरण होणार आहे.

प्रधानमंत्री किसान सन्मान निधी योजनेस २४ फेब्रुवारी २०२१ला दोन वर्ष पूर्ण झाली आहेत. या निमित्ताने या योजने अंतर्गत उत्कृष्ट कार्य करणारे राज्य व निवडक जिल्ह्यांना येथील पुसा कॉम्प्लेक्समध्ये आयोजित कार्यक्रमात गौरविण्यात येणार आहे. महाराष्ट्राचे कृषी मंत्री दादाजी भुसे, कृषी विभागाचे सचिव तथा कृषी आयुक्त यांच्यासह, पुणे आणि अहमदनगरचे जिल्हाधिकारी या कार्यक्रमाला उपस्थित राहणार असून लवकरच पुरस्कार प्रदान केले जातील, असे राज्य सरकारने म्हटले आहे.

भौतिक तपासणी व तक्रार निवारणात महाराष्ट्र अग्रेसर -

प्रधानमंत्री किसान सम्मान निधी योजनेंतर्गत निवड केलेल्या लाभार्थ्यांपैकी ५ टक्के लाभार्थींची तपासणीसाठी केंद्र शासनाकडून महाराष्ट्र राज्यात ४,६८,७४७ शेतकऱ्यांची जिल्हा, तालुका व गाव निहाय यादी प्राप्त झाली होती. त्यातील ९९.५४ टक्के लाभार्थ्यांची भौतिक तपासणी पूर्ण करून राज्याने देशात पहिला क्रमांक पटकावला आहे. राज्यात या योजनेसंदर्भात जवळपास ३८९९१ तक्रारी नोंदविण्यात आल्या होत्या. त्यापैकी २३६३२ तक्रारींचा अर्थात ६० टक्के पेक्षाही जास्त तक्रारींचा निपटारा केल्याने देशपातळीवर राज्याला प्रथम क्रमांकाचा पुरस्कार जाहीर झाला आहे.

पुणे आणि अहमदनगर जिल्हयांचाही होणार सन्मान-

प्रधानमंत्री किसान सन्मान निधी योजनेंतर्गत पुणे जिल्ह्याने प्राप्त २२७८ तक्रारींपैकी २०६२ तक्रारींचा निपटारा करून आणि अहमदनगर जिल्ह्याने लाभार्थी भौतिक तपासणी केली. यातील २८८०२ लाभार्थींची १०० टक्के तपासणी पूर्ण झाली. देशात केलेल्या उल्लेखनीय कामामुळे पुणे व अहमदनगर जिल्ह्यास पुरस्कार मिळाला आहे.

महाराष्ट्र राज्यात आतापर्यंत १.१४ कोटी शेतकऱ्यांची प्रधानमंत्री किसान सन्मान निधी योजनेत नोंदणी झाली होती. आतापर्यंत साधारण १.०५ कोटी शेतकऱ्यांच्या खात्यात ११६३३ कोटी रुपये जमा झाले आहेत.