ख्राईस्टचर्च - सलामी फलंदाज टॅमी ब्यूमोंट (७१) आणि कर्णधार हिथर नाइट (नाबाद ६७) यांच्या अर्धशतकी खेळीच्या जोरावर इंग्लंडच्या महिला क्रिकेट संघाने न्यूझीलंड संघाचा पहिल्या एकदिवसीय सामन्यात पराभव केला. इंग्लंडने हा सामना ८ गडी राखून जिंकत ३ सामन्यांच्या मालिकेत १-० ने आघाडी घेतली.

न्यूझीलंड संघाने प्रथम फलंदाजी करताना सलामी फलंदाज हेली जेंसन ५३ आणि ब्रुक हालिडे याच्या ५० धावांच्या जोरावर ४५.१ षटकात १७८ धावांचे आव्हान उभारले. इंग्लंडकडून ताश फरांट आणि सोफी एकलेस्टोन यांनी प्रत्येकी २-२ गडी बाद केले. तर कॅथरीन ब्रंट, फ्रेया डेविस, नताली स्कायवर, साराह ग्लेन आणि नाइट यांनी प्रत्येकी १-१ गडी टिपला.

यजमान संघाने दिलेले हे आव्हान इंग्लंड संघाने ३३.४ षटकात आठ गडी राखून सहज पूर्ण केले. ब्यूमोंटने ८६ चेंडूत ११ चौकाराच्या मदतीने ७१ धावांची खेळी केली. तर नाइटने ६९ चेंडूत ७ चौकार आणि एका षटकारासह नाबाद ६७ धावांची खेळी साकारली. टॅमी ब्यूमोंट सामनावीर ठरली. उभय संघातील दुसरा एकदिवसीय सामना २६ फेब्रुवारीला होणार आहे.

हेही वाचा - राष्ट्रपती कोविंद यांच्या हस्ते होणार जगातील सर्वात मोठ्या क्रिकेट मैदानाचे उद्घाटन

हेही वाचा - Video : पुजाराच्या मुलीचा वाढदिवस; हार्दिक, रोहित, रहाणे यांच्या बच्चा पार्टीची धम्माल