औरंगाबाद - अल्पवयीन मुलीची छेड काढून तिला मारहाण करणाऱ्या आरोपीला एमआयडीसी वाळूज पोलिसांनी अटक केली आहे. आरोपीला १७ फेब्रुवारी रोजी अटक करण्यात आली. अजय मधुकर चव्हाण (वय २२) असे अटक करण्यात आलेल्या आरोपीचे नाव आहे.

हेही वाचा - औरंगाबाद: अज्ञात वाहनाच्या धडकेत वृद्धेचा मृत्यू

वाळूज एमआयडीसी परिसरातील घटना

एमआयडीसी परिसरातील एक १७ वर्षीय अल्पवयीन मुलगी ही सायंकाळी ७ वाजेच्या सुमारास पायी जात असताना मुलीच्या घराशेजारी राहणाऱ्या अजय मधुकर चव्हाण (वय २२) याने तिला रस्त्यात अडवले. यावेळी, तू माझ्याशी का बोलत नाही, असे म्हणून अजयने मुलीचा हात धरला व तिला शिवीगाळ करून मारहाण केली.

मुलीच्या वडिलांना जिवे मारण्याची धमकी

दरम्यान, मुलीचे वडील तिथे आल्याने हा प्रकार त्यांच्या लक्षात आला. त्यांनी मुलीला अजयच्या तावडीतून सोडवले. यावेळी अजयने मुलीच्या वडिलांना जिवे मारण्याची धमकी दिली. भररस्त्यावर हा प्रकार सुरू असल्याने लगतच्या कंपनीतील सुरक्षारक्षक व कामगारांनी घटनास्थळ गाठून मध्यस्थी केली.

पोलिसांनी आरोपीला केली अटक

अजयने यापूर्वीही अल्पवयीन मुलीला त्रास दिला आहे. तो नेहेमी तिचा पाठलाग करून तिला मारहाण करायचा. या प्रकरणी वाळूज एमआयडीसी पोलीस ठाण्यात गुन्हा दाखल करण्यात आला व अरोपीला अटक करण्यात आली.

हेही वाचा - आकाशवाणी चौकात ट्रॅव्हल्सने महिलेला चिरडले