ଶ୍ରୀନଗର: 11 ମାସ ପରେ ଜମ୍ମୁ-କାଶ୍ମୀର ଉପତ୍ୟକା ଓ ଜମ୍ମୁ ଡିଭିଜିନରେ ଆରମ୍ଭ ହେବାକୁ ଯାଉଛି ଟ୍ରେନ ସେବା । ମହାମାରୀ କୋରୋନା ପାଇଁ ଟ୍ରେନ ସେବା ବନ୍ଦ ପଡିଥିଲା । ଆଜିଠୁ ପୁଣି ଥରେ ଟ୍ରାକ ଦୌଡିବ ଟ୍ରେନ । ପ୍ରଥମ ଦିନରେ ବାରମୂଳାରୁ ବନିହାଲକୁ ଆଂଶିକ ଭାବେ ଟ୍ରେନ ଚଳାଚଳ କରିବ ।

ସମ୍ପୂର୍ଣ୍ଣ ଭାବେ ଟ୍ରେନ ଚଳାଚଳ କରିବା ପୂର୍ବରୁ ରବିବାର ବାରମୂଳାରୁ ବନିହାଲ 137 କିମି ପର୍ଯ୍ୟନ୍ତ ଟ୍ରାଏଲ କରାଯାଇଥିଲା । ବିନା ଯାତ୍ରୀ ଦ୍ବାରା ଟ୍ରେନ ଚଳାଚଳ କରି ସମସ୍ତ ପ୍ରସ୍ତୁତି ଶେଷ କରାଯାଇଛି ବୋଲି ଉତ୍ତରାଞ୍ଚଳର ରେଳୱେର ଜଣେ ଅଧିକାରୀ କହିଛନ୍ତି ।

ଆଜି ସକାଳ 11.25 ମିନିଟରୁ ବନିହାଲରୁ ଗୋଟିଏ ଟ୍ରେନ ବାରମୂଳା ଯିବ । ସେହିପରି ବାରମୂଳାରୁ ଆଉ ଏକ ଟ୍ରେନ ସକାଳ 09.10ରେ ବନିହାଲ ଅଭିମୁଖେ ଗଡିବ । ଦୈନିକ ଦୁଇଟି ଟ୍ରେନ ଏହି ଦୁଇ ସ୍ଥାନ ମଧ୍ୟରେ ଚଳାଚଳ କରିବାକୁ ପ୍ରାରମ୍ଭିକ ଭାବେ ନିଷ୍ପତ୍ତି ହୋଇଛି । ଆଗକୁ ସ୍ଥିତି ଦେଖି ଟ୍ରେନ ସଂଖ୍ୟା ବଢାଯାଇପାରେ। ତେବେ ବାରମୂଳାରୁ ବନିହାଲ ମଧ୍ୟର ମୋଟ 17ଟି ଷ୍ଟେସନ ରହିଛି ।

@IANS