ETV Bharat Default

କଟକ: ରାଷ୍ଟ୍ରୀୟ ମର୍ଯ୍ୟାଦ ସହ ପଞ୍ଚଭୂତରେ ଲୀନ ହେଲେ ଡି ପ୍ରକାଶ ରାଓ । ସ୍ଥାନୀୟ କାଳିଆ ବୁଦା ଶ୍ମଶାନରେ ପଞ୍ଚଭୂତରେ ଲୀନ ହେଲେ ପ୍ରଖ୍ୟାତ ପରୋପକାରୀ, ସମାଜସେବୀ ପ୍ରକାଶ ରାଓ । ଆଉ ତାଙ୍କ ଭଳି ସୁଯୋଗ୍ୟ ସନ୍ତାନକୁ ହରାଇ କାନ୍ଦୁଛି କଟକ, ସ୍ତବ୍ଧ ତାଙ୍କ ହାତ ତିଆରି ସ୍କୁଲ ‘ଆଶା ଓ ଆଶ୍ବସନା’ । ଗୁରୁଜୀଙ୍କୁ ମନେପକାଇ କୋହ ସମ୍ଭାଳିପାରୁନାହାନ୍ତି ପିଲାଏ , ଝୁରୁଛନ୍ତି ଶୁଭେଚ୍ଛୁ, ସମର୍ଥକ । ସଟର ଭିତରେ ନିଜ ପ୍ରିୟ ମଣିଷର ବାଟ ଚାହିଁ ବସିଛି ସେଇ ଚା ’ କେଟଲୀ । 62 ବର୍ଷ ମଧ୍ୟରେ ଜୀବନ ର ଅନେକ ସଫଳତା ପାଇଛନ୍ତି ସେ। ସମାଜ ପାଇଁ ପ୍ରକାଶଙ୍କ ନିଃସ୍ବାର୍ଥପର ତ୍ୟାଗ ଅପୂରଣୀୟ । ତାଙ୍କର କର୍ମ ଅସାଧାରଣ ହୋଇ ବି ଆଜୀବନ ସେ ସାଧାରଣ ହୋଇ ବଞ୍ଚିଛନ୍ତି । ମାନବ ସେବାର ଜୁନୁନ ଓ ସରଳ, ମିଷ୍ଟଭାଷୀ ସ୍ବଭାବ ତାଙ୍କୁ କରିଛି ସ୍ବତନ୍ତ୍ର । ବସ୍ତିପିଲାଙ୍କୁ ପାଠ ପଢାଇବା ସହ ରକ୍ତଦାନ ଓ ରୋଗୀସେବା କ୍ଷେତ୍ରରେ ସେ ସୃଷ୍ଟି କରିଛନ୍ତି ମାଇଲଖୁଣ୍ଟ । ରାଜ୍ୟର ସର୍ବାଧିକ ରକ୍ତଦାତା ତାଲିକାରେ ସେ ସବୁଠୁ ଆଗରେ । ଅସହାୟ, ଅବହେଳିତ ଲୋକଙ୍କୁ ନିଜ ରକ୍ତ ଦେଇ ବଞ୍ଚାଇବାରେ ସେ କେବେ ଦେଉନଥିଲେ ପଛଘୁଞ୍ଚା ।