ప్రపంచంలోనే అతిపెద్ద క్రికెట్​ మైదానమైన మొతెరా​ స్టేడియాన్ని బుధవారం (ఫిబ్రవరి 24న) రాష్ట్రపతి రామ్​నాథ్​ కోవింద్​ అధికారికంగా ప్రారంభించనున్నారు. హోం మంత్రి అమిత్​ షాతో పాటు క్రీడా శాఖ మంత్రి కిరణ్​ రిజిజు హాజరవుతారు. ప్రధాని మోదీ వర్చువల్​గా ఈ కార్యక్రమంలో పాల్గొననున్నారు.

స్టేడియం విశేషాలు..

• గుజరాత్​లోని సబర్మతి నది ఒడ్డున ఈ స్టేడియాన్ని తొలుత 1982లో నిర్మించారు. 2015లో దీన్ని కూల్చేసి.. దాదాపు రూ.800 కోట్లతో తిరిగి నిర్మించారు. దానికి సర్దార్​ పటేల్​ గుజరాత్​ స్టేడియంగా నామకరణం చేశారు.
• 63 ఎకరాల విస్తీర్ణంలో నిర్మించిన ఈ మైదానంలో.. ఒకేసారి లక్షా పదివేల మంది కూర్చొనే సామర్థ్యం ఉంది. ఎల్​ఈడీ బల్బులు ఏర్పాటు చేసిన మొట్టమొదటి మైదానం ఇదే. వీటిని కూడా ఫ్లడ్​లైట్లుగా కాకుండా స్టేడియం పైకప్పుకు అమర్చారు.
• ఇంతకాలం 90వేల సామర్థ్యంతో ఉన్న మెల్​బోర్న్​ క్రికెట్​ స్టేడియం ప్రపంచంలో అతిపెద్ద మైదానంగా ఉండేది. ఇప్పుడు దాని స్థానాన్ని మొతెరా అధిగమించనుంది.
• మూడు వేల కార్లు, పదివేల ద్విచక్ర వాహనాలకు సరిపోయేలా పార్కింగ్​ స్థలాన్ని ఈ స్టేడియానికి కేటాయించారు. ఎంత భారీ వర్షం కురిసిన నిమిషాల్లో తిరిగి మ్యాచ్​ను నిర్వహించేలా డ్రైనింగ్ వ్యవస్థను రూపొందించారు.

పునర్​నిర్మాణం తర్వాత ఈ స్టేడియంలో భారత్​, ఇంగ్లాండ్​ల మధ్య మూడో టెస్టు జరగనుంది. నాలుగో టెస్టుకు కూడా ఇదే వేదిక. ఇరు జట్ల మధ్య 5 మ్యాచ్​ల టీ20 సిరీస్​కు సంబంధించి అన్ని మ్యాచ్​లు ఇదే మైదానంలో జరగనున్నాయి.

ఇదీ చదవండి: హైదరాబాద్​లో యూసుఫ్​ పఠాన్​ క్రికెట్​ అకాడమీ