మూడో టెస్టుకు తమ తుది జట్టులోకి ఎవరిని తీసుకోవాలో ఇంకా తేల్చలేదని ఇంగ్లాండ్​ కెప్టెన్​ జో రూట్​ తెలిపాడు. అందుకు ఇంకాస్త సమయం పడుతుందని పేర్కొన్నాడు.

"మొతేరా పిచ్​తో పాటు పింక్​ బాల్​ టెస్టు గురించి మాకు తగినంత అవగాహన లేదు. అందుకే తుది జట్టులోకి ఎవరిని తీసుకోవాలనేది ఇంకా నిర్ణయించలేదు. వీలైనంత త్వరగా జట్టును ప్రకటిస్తాం. బౌలింగ్​ విభాగంలో ఆర్చర్ గాయం నుంచి కోలుకోవడం శుభపరిణామం. అతడు ప్రపంచ స్థాయి ఆటగాడు. అన్ని నైపుణ్యాలున్న బౌలర్​. జోఫ్రా రాకతో బౌలింగ్​లో సమతూకం ఏర్పడుతుంది."

-జో రూట్​, ఇంగ్లాండ్​ కెప్టెన్.

ఆటగాళ్ల రొటేషన్ పాలసీలో భాగంగా రెండో టెస్టుకు దూరమైన అండర్సన్​ తిరిగి టీమ్​కు అందుబాటులోకి వచ్చాడు. గాయం కారణంగా చెన్నై టెస్టులో ఆడలేకపోయిన జోఫ్రా ఆర్చర్​.. ఫిట్​నెస్​ సాధించాడు. వీరితో పాటు స్టువర్ట్​ బ్రాడ్​ కూడా పోటీలో ఉన్నాడు. వీరి ముగ్గురిలో ఎవరిని తుది జట్టులోకి తీసుకోవాలనేది రూట్​కు తలనొప్పిగా మారింది.

సీనియర్​ వికెట్​ కీపర్​, బ్యాట్స్​మెన్​ జానీ బెయిర్​ స్టో.. తిరిగి స్క్వాడ్​లోకి వచ్చాడు. ఇప్పటికే జట్టులో ఉన్న బెన్​ ఫోక్స్​ను ఆడించాలా? లేదా బెయిర్​ స్టోకు అవకాశమివ్వాలా? అనే సందిగ్ధం ఇంగ్లాండ్​ టీమ్​లో ఏర్పడింది.

పిచ్​పై స్పష్టత వచ్చాక జట్టును ప్రకటిస్తామని ఇంగ్లిష్​ సారథి పేర్కొన్నాడు. ఈ రోజు రాత్రి ప్రాక్టీస్​ సెషన్ తమకు కొంత మేర ఉపయోగపడుతుందని తెలిపాడు. తర్వాతి రోజు బంతి ఎలా స్పందిస్తుందనేది ఓ అవగాహన వస్తుందని.. దాన్ని బట్టి టీమ్​లో ఎవరెవరు ఉండాలనేది నిర్ణయిస్తామని రూట్​ వెల్లడించాడు.

ఇదీ చదవండి: మొతేరా పిచ్​పై కోహ్లీ అంచనాలు ఇలా...