గోల్ఫ్​ స్టార్​ టైగర్​ వుడ్స్​కు కారు ప్రమాదం జరిగింది. వాహనం తిరగబడిన ఘటనలో అతడి కాళ్లకు తీవ్ర గాయాలయ్యాయి. పోలీసులు వెంటనే ఆస్పత్రిలో చేర్చగా.. వైద్యులు వుడ్స్​ కాళ్లకు శస్త్రచికిత్స చేస్తున్నారు.

అమెరికా లాస్ ​ఏంజెల్స్​లో ఉదయం 7.15కు ఈ ప్రమాదం జరిగినట్లు సమాచారం. హుటాహుటిన ఆయనను అంబులెన్స్​లో ఆసుపత్రికి తరలించారు. లాస్​ ఏంజెల్స్​లోని ఓ టోర్నీకి అతిథిగా వుడ్స్​ హాజరయ్యారు. విజేతకు ట్రోఫీని అందజేశారు. అనంతరం ఈ ప్రమాదం జరిగింది.

ఈ ప్రమాదం జరిగే సమయంలో కారులో టైగర్​ వుడ్స్​ తప్ప మరేవరూ లేరని పోలీస్​ అధికారి స్పష్టం చేశారు. గోల్ఫ్​ స్టార్​కు తీవ్ర గాయలయ్యాయని.. అయితే ఈ ప్రమాదానికి కారణనాన్ని తెలుసుకునేందుకు ప్రాథమిక దర్యాప్తును ప్రారంభించారని తెలిపారు. కారులో ఇరుక్కుపోయిన వుడ్స్​ను బయటకు తీసుకొచ్చేందుకు అద్దాన్ని పగులకొట్టాల్సి వచ్చిందని వెల్లడించారు. అయితే కారు లోపలి భాగంలో మాత్రం ఎలాంటి చెక్కుచెదరలేదని పేర్కొన్నారు.

కెరీర్​లో 81 పీజీఏ టైటిళ్లు, 14 మేజర్​ ట్రోఫీలు, నాలుగుసార్లు మాస్టర్స్​ విజేతగా నిలిచాడు టైగర్​ వుడ్స్​. గోల్ఫ్​ చరిత్రలో మరెవ్వరికీ సాధ్యం కాని ఘనతలు అందుకుని దిగ్గజాలకే దిగ్గజం అనిపించుకున్నాడు టైగర్​ వుడ్స్. అంతేకాకుండా 2019లో ప్రెసిడెన్షియల్​ మెడల్​ ఆఫ్​ ఫ్రీడం పురస్కారం దక్కింది.

• ఇదీ చూడండి: 'పింక్'​ జట్టుపై ఎటూ తేల్చని ఇంగ్లాండ్!