ریاست کرناٹک کے چکابلاپورہ کے جنگلاتی علاقہ میں بعض افراد نے برڈ فلو کے خوف سے پانچ ہزار سے زائد چوزوں کو چھوڑ دیا ۔ چکابالاپورہ کے کنیتاہلی گاؤں میں جب لوگ صبح بیدار ہوئے تو چوزوں کی آواز سن کر حیران رہ گئے۔ چوزوں کی آواز جنگلاتی علاقہ سے آرہی تھی۔ گاؤں والوں نے جنگل کا رخ کیا اور وہاں جاکر دیکھا تو وہاں تقریباً 5 ہزار چوزے تھے۔

گاؤں والوں کے مطابق برڈ فلو کے خوف سے پولٹری صنعت سے وابستہ بعض افراد نے یہاں علی الصبح بڑی تعداد میں چوزوں کو چھوڑ کر فرار ہوگئے۔ انہوں نے اس بات کا بھی شبہ کیا کہ ’شاید تمل ناڈو یا آندھراپردیش سے تعلق رکھنے والے افراد نے برڈ فلو سے خوف زدہ ہوکر کرناٹک کے جنگلاتی علاقہ میں ان چوزوں کو چھوڑ دیا‘۔

برڈ فلو کے خوف سے چھوڑے گئے چوزے کنیتا ہلی گاؤں کے اطراف پھیل گئے اور گاؤں والوں کو چوزے پکڑتے ہوئے دیکھا گیا۔