پولیس کمشنر ڈاکٹر نکھل گپتا نے اورنگ آباد میں کورونا وبا کی روک تھام کے لیے شہری حدود میں رات کے کرفیو کا اعلان کیا ہے۔ انہوں نے کہا کہ اورنگ آباد کے شہری حدود میں دو ہفتوں کے لیے رات 11 بجے تا صبح 6 تک کرفیو نافذ رہے گا۔

ڈاکٹر نکھل گپتا نے اورنگ آباد میں کورونا کے مریضوں کی بڑھتی ہوئی تعداد پر تشویش کا اظہار کیا اور لوگوں کو احتیاط برتنے کا مشورہ دیا۔ پولیس کمشنر نے بتایا کہ آج کلکٹر اور میونسپل کمشنر کے ساتھ ایک اجلاس منعقد کیا گیا جس میں حالات کا جائزہ لیا گیا۔

انہوں نے کہا کہ اجلاس میں رات کے کرفیو کا فیصلہ لیا گیا۔ انہوں نے کہا کہ لوگ تقریبات اور بازاروں میں بھیڑ اکھٹا کر رہے ہیں اور ماسک کا استعمال بھی نہیں کیا جارہا ہے۔ کمشنر نے مزید کہا کہ کرفیو کی خلاف ورزی کرنے والوں کے خلاف قانونی کاروائی کی جائے گی۔ کرفیو کے دوران ’اسینشل سرویس‘ کےلیے چھوٹ رہے گی۔